Mar 1 | SBE | STEP | Yesu Keliso Yaubada natuna wasana namwanamwana ye hetubu doha teina:

a(Malakai 3:1)

b(Aisaiya 40: 3)

Mark 1

Yowane Babatiso kana paisowa

(Mataiyo 3:1-12; Luka 3:18; Yowane 1:19-28)

1 Yesu Keliso Yaubada natuna wasana namwanamwana ye hetubu doha teina: 2 Yaubada yona hedehedede wa Aisaiya peloweta yona buka unai, ye wane:

“Yogu tautauwasa ya hetamali bagunaiyawa
kowa yom keda ye kabinonohai.” ^a
3 “Tamowai hesau balabala unai ye yogayoga ye wane,
‘Guiyau yona keda kwa kabinonohai, yo yona kabalau kwa hedudulai!’” ^b
4 Unai Yowane ye laoma. Balabala unai ye miyamiya na ye hebahebabatiso. Taulaoma udiyedi ye lauguguya: “Nuwamiu kwa buidi, kabo Yaubada yomi yababa ye nuwatugabaedi. Yomi nuwabui ne kaba hemamohoina ede babatiso.” 5 Yudeya kasa taumiyaidi yo Yelusalema unai taumiya se lau iya unai. Yodi yababa se hededehemasalahadi, na Yolidani sagasagana unai ye hebabatisoidi.

6 Yowane kana kwama kamela wiyana unai se ginauli na kana dagilolo meta suisui dahina. Na kana kai meta mwadimwadi yo kamwakamwa. 7 Ye hededehemasalaha ye wane, “Tamowai hesau kabo ye mulitama. Iya ye sae kalili na kabo yau. Na nige gonowagu taba ya dunedobi iya kana buti mainadi ya yailidi. 8 Yau waila unai ya hebabatisoigomiu, na iya kabo Yaluwa Tabuna unai ye hebabatisoigomiu.”

Yesu yona babatiso yo yona laukita

(Mataiyo 3:13-4:11; Luka 3:21-22 yo 4:1-13)

9 Tem huyana ne unai Yesu Galili magaina hesau hesana Nasaleta unai ye laoma ede Yowane ye hebabatisoi Yolidani sagasagana unai. 10 Waila wa unai ye gayo ye sae na kabo ye kitasae galewa ye kita ye taigali, na Yaluwa Tabuna kana kao doha bunebune ye dobima iya kewana ne unai. 11 Na kalina hesau galewa ne unai ye laoma na ye wane, “Kowa natugu! Ya gadosisi kaliliyego yo nuwagu ku henamwa kaliliyei!”

12 Mahanana ne unai Yaluwa Tabuna Yesu ye hetamali ye lau balabala unai. 13 Mayadai 40 balabala unai suisui kaikaikalasidi kalidi wai ye miya. Na Satani Yesu ye laukita, na kabo anelu iya se kitahetete.

Yesu tauyamayama hasi ye yoganedi

(Mataiyo 4:12-22; Luka 4:14-15 yo 5:1-11)

14 Huya hesau Heloda wasawasa Yowane ye gudui numa tutugudu unai. Kabotaki Yesu ye lau Galili Yaubada wasana namwanamwana ye lauguguyaei, 15 ye wane, “Huya wa ye lagemako, Yaubada yona basileiya ye hanahanaumako. Nuwamiu kwa buidi yo wasa namwanamwana ta kwa kawamamohoiyei.”

16 Huya hesau Yesu Galili Gabwana ^{▼▼1:16 Galili Gabwana meta waila lakilakina Galili tanona unai, kana kao doha gabwa.} dedekana wa unai ye yona ye laulau ede tauyamayama labui ye kitadi, Simona ma kana kaha Andeleya yodi hinaya unai se yamayama. 17 Na kabo ye yoganedi ye wane, “Kwa saema kwa hemuliwatanigau, na kabo ya hekatagomiu tamowai tauyamayamaidi.” 18 Na mahanana ne unai se dahalai yodi hinaya se laugabaedi na iya se hemuliwatani.

19 Yesu ye taulau na kabo Sebedaiyo natunao labui Yowane yo Yamesi ye kitadi yodi waga unai yodi hinaya se polapolaidi. 20 Na ye yogalau yodi labui wa udiyedi na waga wa se pesagabaei, na tamadi Sebedaiyo ma kana hewahewaliyo se laugabaedi na Yesu se hemuliwatani.

Yesu Kapelenauma unai yaluwa yabayababana ye hedede hepesa

(Luka 4:31-37)

21 Yesu yona hekahekatao maiyanao se lage Kapelenauma unai, na kabo Sabati ^{▼▼1:21 Sabati kaniyona ede ‘kaiyawasi mayadaina’. Huya bagubagunana unai mayadai Satade Dius se hetabuyei yo unai se tapwalolo. Satade meta wiki kesega mayadaina gehegehena. Teina huya ta kita mayadai Sande (Sunday) ta hetabuyei yo ta tapwalolo, matawuwuna ede Yaubada Yesu ye hetolouyoi tenem mayadaina ne unai.} unai ye mwalaesae sunago ^{▼▼1:21 Sunago meta Dius yodi kaba koikoigogo yo tapwalolo numana. Dimdim yodi hesa ‘synagogue’ na Buka Suau unai se wane ‘sunago’. Apostolo 6:9 hededehemasalahana hinage ku hasili.} unai, na ye hetubu ye lauhekata. 22 Yona lauhekata wa se nokoei, matawuwuna ye hedede hasahasaidi ma gigibwalina, nige doha laugagayo taulauhekata tamowaidi.

23 Sunago wa kalona wai tamowai hesau. Yaluwa yabayababana iya ye luwui na ye yogayoga 24 ye wane, “Yesu Nasaleta tamowaina! Ku laoma inai kam paisowa saha? Bena ku hetatagwaligwaligai! Kabim ya kata kowa Yaubada yona hetabu tamowaina ede.” 25 Na Yesu ye hededebayao iya unai ye wane, “Ku mwanou na tamowai me ku pesagabaei!” 26 Yaluwa yabayababana wa tamowai wa ye nukui, na ye yogahi yo ye pesagabaei. 27 Siya maudoidi se noko na se henahenamai uyoidi se wane, “Teina ta saha? Teina ta lauhekata hauhauna? Yona gigibwali yena ye hededelau yaluwa yabayababadi udiyedi, na se kawakabiyei!” 28 Nige bayaona iya wasana ye lau Galili maudoina ye hetakikili.

Yesu tamowai gwaudi ye henamwanamwadi

(Mataiyo 8:14-17; Luka 4:38-41)

29 Sunago unai se pesa se lau Simona ma kana kaha Andeleya yodi numa unai se mwalae, Yamesi yo Yowane maiyadiyao. 30 Simona bwasiyana waihiu ye kasiyebwa tauna se gigibwali kalili, unai se hededelau Yesu unai. 31 Ede ye laoma na ye kabilau nimana ne unai na ye kabihetolo. Na waihiu wa ye namwanamwa na kabo kadi kai ye moseidi.

32 Mahana wa ye dui kabo taukasikasiyebwa gwaudi yo hinage tamowai yaluwa yabayababadi siya se luwuidi wa se woyaidima Yesu unai. 33 Magai tamowaidiyao boda lakilaki se lagegogoi numa kawamatana wa unai. 34 Tamowai kadi kasiyebwa udoi udoi ye henamwanamwadi. Yo yaluwa yabayababadi gwaudi ye hedede hepesadi na ye hedede hekaiyawasidi tabu se hedehedede, matawuwuna ede iya kabina se katako.

Yesu Galili unai ye lauguguya

(Luka 4:42-44)

35 Malatomtom gagilina Yesu numa wa ye laugabaei na ye lau balabala hesau unai ye tapwalolo. 36 Na Simona ma kana kahao se lau iya se wasenei. 37 Yesu se lobai ede se hededelau unai se wane, “Tamowai maudoidi se wasewaseneigo!” 38 Na ye hededelau udiyedi ye wane, “Taba ta lau magai hekadiyo udiyedi hinage ya lauguguya. Teina hesabana ede ya laoma ta.” 39 Galili se tauhetakikili, na Yesu ye lauguguya sunago udiyedi, yo hinage yaluwa yabayababadi ye hedede hepesadi.

Yesu taulepela hesau ye henamwanamwa

(Mataiyo 8:1-4; Luka 5:12-16)

40 Tamowai hesau kana kasiyebwa lepela ye laoma Yesu unai ye tulibono na ye kaibwada katekamkamna ye wane, “Ena ku henuwa kabo ku henamwanamwagau.” 41 Yesu tamowai wa ye katekamkamnaei na nimana ye helelelaei ye kabilau unai, na ye hededelau iya unai ye wane, “Ya henuwa, kowa kabo ku namwanamwa.” 42 Na mahanana ne unai kasiyebwa lepela wa ye ulu gehe na tamowai wa ye namwanamwa. 43 Na Yesu ye hededebayao iya unai ye wane, 44 “Tabu tamowai hesau yona ku hedehedede. Na ku lau taukaitalasam unai ku hemasalahago na ye kitasipwaigo. Na kabo heꞌaꞌa kaitalasamdi Mose ye hedede wa ^{▼▼1:44 Ku hasili Lewitika 14:2-4:} ku ginaulidi, na kabo tamowai se kitago meta ku namwanamwako.” 45 Na tamowai wa ye pesa ede ye lau wasana wa ye hededehemasalaha yo ye helaki. Unai Yesu nige gonowana ye taumasalaha magai udiyedi, na balabala gaibu udiyedi ye miya. Na teha maudoina tamowaidi se laoma iya unai.